काठमाडौँ, २५ भदौ । सिरहामा लागुऔषध ब्राउन सुगर सहित ४ जना पक्राउ परेका छन् ।
जिल्ला प्रहरी कार्यालय सिरहाका अनुसार लागुऔषध कारोबार भइरहेको गोप्य सूचनाको आधारमा मिर्चैया नगरपालिका १२ सिक्रोन नहरबाट उनीहरूलाई पक्राउ गरेको हो ।
बुधबार राति इलाका प्रहरी कार्यालय मिर्चैया र लागुऔषध ब्यूरो शाखा कार्यालय गोलबजारबाट खटिएको संयुक्त टोलीले चेकजाँचको क्रममा २४ वर्षीय दीपक सहनीले लगाएको पाइन्टको बायाँ खल्तीमा लुकाइछिपाई राखेको सानो स्टिलको बट्टाबाट १५ ग्राम २२० मिलिग्राम लागुऔषध ब्राउनसुगर फेला परेको हो । सहनीसँगै रहेका सोही स्थानका २० वर्षीय सुनिल कापर, २५ वर्षीय सरोज कापर र २२ वर्षीय पप्पु कापर पनि पक्राउ परेका छन् ।
पक्राउ परेकाहरूबाट लागुऔषध ब्राउन सुगरसँगै ४ थान मोबाइल र २ हजार ५ सय नगद पनि बरामद भएको छ । पक्राउ परेका चारै जना अभियुक्तहरूलाई थप अनुसन्धानका लागि हिरासतमा लिई इलाका प्रहरी कार्यालय मिर्चैयामा राखिएको छ ।
