काठमाडौँ, २१ भदौ । रौतहटको कटहरिया बजारमा चोरीको खसी खरिद–बिक्रीमा संलग्न रहेको आरोपमा चार जना पक्राउ परेका छन् ।
पक्राउ पर्नेमा कटहरिया नगरपालिका–५ का २० वर्षीय मुकेश कुमार राम, १७ वर्षीय रुपेश राम, खसी खरिद गर्ने १८ वर्षीय समीर मन्सुरी र उनको साझेदार ४७ वर्षीय दिनेश दास बानियाँ रहेको प्रहरीले जनाएको छ ।
प्रहरीका अनुसार मुकेश र रुपेशले स्थानीय सफ्रुला भनिने सफरुदिन मियाँ मन्सुरीको करिब १५–२० किलो तौलको एउटा खसी बुधबार राति चोरी गरेका थिए। चोरी गरिएको खसी उनीहरूले समीर र दिनेशलाई १३ हजार रुपैयाँमा बिक्री गरेको प्रारम्भिक अनुसन्धानबाट खुलेको छ ।
खसी चोरी भएको थाहा पाएपछि पीडित सफ्रुलाले खोजी गर्ने क्रममा मुकेश र रुपेशलाई नियन्त्रणमा लिएर इलाका प्रहरी कार्यालय कटहरियामा बुझाएका थिए।
त्यसपछि इलाका प्रहरी कार्यालय कटहरियाका प्रमुख वरिष्ठ सई जयप्रकाश साहको टोलीले पक्राउ परेका आरोपितसँग सोधपुछ गर्दा चोरीको खसी खरिद गर्ने समीर र दिनेशको समेत संलग्नता खुलेको भन्दै उनीहरूलाई पक्राउ गरेको हो।
चारै जनालाई नियन्त्रणमा लिएर अनुसन्धान अघि बढाइरहेका बेला केही बिचौलियाले घटनालाई मिलापत्रमार्फत टुंग्याउने प्रयास गरेको प्रहरी स्रोतले जनाएको छ ।
