धनगढी, १८ भदौ । कैलालीको लम्कीचुहा नगरपालिका–८ गप्कामा हाइसको ठक्करबाट १५ वर्षीया किशोरीको मृत्यु भएको छ।
पूर्व–पश्चिम राजमार्गमा बिहीबार बिहान पश्चिमबाट पूर्वतर्फ जाँदै गरेको सुदूरपश्चिम प्रदेश ०१–००१ ख ४०८५ नम्बरको विद्युतीय हाइसले बाटो काट्ने क्रममा पैदलयात्री लम्कीचुहा नगरपालिका–८ की १५ वर्षीया स्वस्तिका न्यौपानेलाई ठक्कर दिएको थियो ।
हाइसको ठक्करबाट टाउकोमा गम्भीर चोट लागेकी न्यौपाने टिकापुर अस्पताल लगिएकोमा बिहान मृत्यु भएको प्रहरीले जनाएको छ। चालक कैलालीको गोदावरी नगरपालिका–५ का ३० वर्षीय प्रताप चौधरी प्रहरी नियन्त्रणमा छन्। घटनाबारे थप अनुसन्धान भइरहेको जिल्ला प्रहरी कार्यालय कैलालीका प्रहरी प्रवक्ता प्रहरी नायव उपरीक्षक योगेन्द्र तिमील्सिनाले जानकारी दिए ।
