भक्तपुर, २३ साउन । चाँगुनारायण नगरपालिका वडा नं.२ स्थित दुवाकोट क्षेत्रलाई हराभरा बनाउने उद्देश्यले “समुदायको लागि २ घण्टा” अभियानको १७१ औं साप्ताहिक कार्यक्रम सम्पन्न भएको छ ।
केएमसी अस्पतालको अग्रभागदेखि फैढोका गणेश मन्दिरतर्फ जाने सडक मार्गमा शनिबार सम्पन्न उक्त कार्यक्रममा कपुर, कल्की र असारे गरी तीन प्रजातिका ४७५ वटा बिरुवा रोपिएका थिए । रोपिएका सबै बिरुवालाई पशुचरण तथा क्षतिबाट जोगाउन टिगार्डको व्यवस्था समेत गरिएको छ । बिरुवा अर्वान ईविय प्रोजेक्टको सहयोगमा उपलब्ध भएका थिए ।
कार्यक्रमको अध्यक्षता गर्दै वडा नं. २ का अध्यक्ष एवं अभियानका संयोजक सोमप्रसाद प्रधानले अभियानलाई निरन्तर १७१ हप्तासम्म डोहोर्याइ ल्याउनुमा वडावासीको साथ-सहयोग नै मुख्य आधार रहेको बताए । उनले यसरी लामो समयसम्म अभियान धान्न सहकार्य गर्ने सबै पक्षप्रति विशेष आभार व्यक्त गरे ।
कार्यक्रम सहजीकरण गर्दै अभियानका सहजकर्ता नबराज काफ्लेले हरियालीले वातावरणमा पार्ने सकारात्मक प्रभावका विविध पक्ष तथ्यसहित प्रस्तुत गरे । बिरुवा अर्वान ईविय प्रोजेक्ट का प्रतिनिधि उदय पोख्रेलले वडा नं.२ ले वृक्षारोपणमार्फत वातावरण संरक्षणमा पुर्याएको योगदानप्रति कृतज्ञता व्यक्त गरे । उनले रोपिएका बिरुवाको संरक्षणमा विशेष ध्यान दिन आग्रह गर्दै ईविय प्रोजेक्ट बाट यस्तै खालको सहयोग आगामी दिनमा पनि निरन्तर रहने प्रतिबद्धता जनाए ।
कार्यक्रममा जनप्रतिनिधि उमेश प्रधान र प्रेम खत्री, पूर्वजनप्रतिनिधि मोहन पौडेल,वडा नं.२ का वास शाखा प्रमुख राममाया रानामगर सहित स्थानीय टोल सुधार समिति तथा सामाजिक संघसंस्थाका प्रतिनिधि र वडावासीहरूको उल्लेख्य सहभागिता रहेको थियो ।
वातावरणमैत्री वडा निर्माणको लक्ष्यसहित अघि बढेको यस अभियानले विभिन्न संघसंस्थाको सहकार्यमा दुवाकोट क्षेत्रलाई क्रमशः हराभरा बनाउँदै लगेको छ ।
