काठमाडौँ, ४ साउन । भक्तपुरको सूर्यविनायक नगरपालिका-८ चुकुपुलबाट स्कुटर चोरी भएको घटनामा संलग्न रहेको अभियोगमा सिन्धुली मरिण गाउँपालिका-४ घर भई काठमाडौँ गोकर्णेश्वर बस्ने ३१ वर्षीय माइते सिं स्याङ्तानलाई आज प्रहरीले पक्राउ गरेको छ ।
प्रहरीका अनुसार सूर्यविनायक नगरपालिका-८ चुकुपुलबाट साउन १ गते राति बा.प्र.०२-०६४ प ६६६८ नम्बरको स्कुटर हराएको भन्दै पीडितले उजुरी दिएका थिए । उजुरीका आधारमा जिल्ला प्रहरी परिसर भक्तपुरबाट खटिएको प्रहरी टोलीले खोजी सुरु गरेको थियो ।
खोजी गर्ने क्रममा उक्त चोरी कार्यमा संलग्न स्याङ्तानलाई सूर्यविनायक नगरपालिका-१ सल्लाघारीबाट चोरी भएको स्कुटरसहित प्रहरीले पक्राउ गरेको हो। घटनाबारे प्रहरीले आवश्यक अनुसन्धान गरिरहेको छ ।
