काठमाडौँ, २५ असार । कैलालीको टीकापुरस्थित इलाका प्रहरी कार्यालयको हिरासतबाट फरार भएका लागूऔषध मुद्दाका थुनुवा संजय नगार्जी पुनः पक्राउ परेका छन्।
टीकापुर नगरपालिका–१ निवासी ३१ वर्षीय नगार्जीलाई इलाका प्रहरी कार्यालय टीकापुर र जिल्ला प्रहरी कार्यालय कैलालीको संयुक्त टोलीले टीकापुरकै अमरावती क्षेत्रबाट पक्राउ गरेको हो ।
प्रहरीका अनुसार विशेष सूचनाका आधारमा भेष परिवर्तन गरी मोटरसाइकल चलाइरहेको अवस्थामा उनलाई नियन्त्रणमा लिइएको हो । पक्राउका बेला उनले चलाइरहेको मोटरसाइकल पनि प्रहरीले बरामद गरेको छ ।
नगार्जी गत असार ८ गते करिब ९ ग्राम ब्राउन सुगरसहित पक्राउ परेका थिए । लागूऔषध मुद्दामा अनुसन्धानका लागि हिरासतमा रहेका उनी आइतबार राति ड्युटीमा रहेका प्रहरी जवानलाई झुक्याएर फरार भएका थिए ।
