काठमाडौँ, २५ असार । एसीसी महिला यू–१९ प्रिमियर कपका लागि मलेसिया जाने नेपाली टोलीको बिदाइ भएको छ ।
नेपाल क्रिकेट संघ (क्यान)ले बिहीबार टोलीको बिदाइ गरेको छ । नेपाल सोनी पाख्रिनको कप्तानीमा मैदान उत्रिँदै छ । प्रतियोगिता जुलाई ११ देखि १८ सम्म मलेसियामा हुँदै छ ।
अन्य समूहमा तीन–तीन राष्ट्र रहँदा नेपालको समूहमा भने चार टोली छन् । समूह ‘ए’मा थाइल्यान्ड, म्यानमार र जापान तथा समूह ‘बी’मा यूएई, ओमान र भुटान छन् । यसैगरी समूह ‘सी’मा इन्डोनेसिया, मलेसिया र कुवेत तथा समूह ‘डी’मा नेपाल, हङकङ, सिंगापुर र कतार छन् ।
नेपालले जुलाई ११ मा कतारसँग खेल्दै प्रतियोगिताको सुरुआत गर्नेछ । यसैगरी, नेपालले जुलाई १२ मा सिंगापुर र जुलाई १४ मा हङकङसँग खेल्नेछ ।
नेपाली टोली : सोनी पाख्रिन (कप्तान), साना प्रविन, अलिसाकुमारी यादव, सावित्री धामी, मनिषा उपाध्याय, रचना चौधरी, रिया शर्मा, अनु कडायत, तृसना विक, कृस्मा गुरुङ, एन्जी पाठक, मनिषा चौधरी, स्नेहा महरा, करुणा विष्ट
