काठमाडौँ, १ असार ।मध्य बानेश्वरस्थित रत्नराज्य माध्यमिक विद्यालय आइतबार ‘मानवीय सेवा’ को केन्द्र बन्यो ।
२२ औं विश्व रक्तदाता दिवसको अवसरमा लायन्स क्लब अफ काठमाडौँ स्प्रिचुअलले आयोजना गरेको रक्तदान कार्यक्रममा ३३ पाउण्ड रगत संकलन भएको छ । ‘मानवताको एक थोपा, रक्तदान गरौं जीवन बचाऔं’ भन्ने मूल मन्त्रलाई आत्मसाथ गर्दै आयोजित उक्त कार्यक्रममा रक्तदाताहरूको उत्साहजनक उपस्थिति रहेको थियो ।
कार्यक्रमको प्रमुख अतिथि एवं प्रतिनिधि सभा सदस्य समिक्षा बास्कोटाले रक्तदानको महत्वबारे चर्चा गर्दै आयोजकलाई धन्यवाद दिनुभयो । उहाँले मानवीय सेवामा लायन्स क्लबले विश्वभर नै एउटा छुट्टै पहिचान बनाएको र यस्ता कार्यक्रमले समाजमा भाइचारा र सेवाको भाव जगाउने बताउनुभयो ।
कार्यक्रमका अध्यक्ष एवं लायन्स क्लब अफ काठमाडौं स्प्रिचुअलका अध्यक्ष नारायण प्रसाद अधिकारीले सबैलाई धन्यवाद दिँदै मानवीय सेवामा क्लब सधैं तत्पर रहने बताउनुभयो । त्यस्तै, प्रथम उपाध्यक्ष वैकुण्ठ पौडेलले स्वागत मन्तव्य राख्दै कार्यक्रमको औचित्य प्रष्ट पार्नुभएको थियो ।
योगमाण्डु र श्री रत्न पुस्तकालयको विशेष सहकार्यमा सम्पन्न उक्त कार्यक्रममा डा. आनन्द गैरे, योगमाण्डुका सन्चालक अर्जुन रखाल मगर, लायन्स लिडर गोकुल प्रसाद प्रजापति एवम अग्नीबिलास अधिकारी लगायतको उपस्थिति रहेको थियो । कार्यक्रममा रक्तदाताहरूलाई सम्मान समेत गरिएको थियो ।
