काठमाडौँ, २१ जेठ । जोतिरहेको गोरुलाई चरम यातना दिएर निर्दयी व्यवहार गरेको आरोपमा प्रहरीले एकजनालाई पक्राउ गरेको छ ।
प्रहरीका अनुसार उक्त भिडियो सामाजिक सञ्जालमा पोस्ट भएपछि प्युठानका जालिराम थापामगरलाई पक्राउ गरी थुनामा राखीएको छ ।
प्युठानको गौमुखी गाउँपालिका– १ बस्ने ३६ वर्षीय थापामगरलाई पक्राउ गरी अनुसन्धानका लागि नियन्त्रणमा लिइएको हो । खेतमा जोत्दै गरेको गोरु हिँड्न नसकेर बसेपछि खाल्डो बनाएर नाकमुख माटोमा गाडेर चरम यातना दिएको भिडियो फेसबुक र टिकटकमा सार्वजनिक भएको थियो ।
प्रहरीले थापामगरमाथि अनुसन्धानका लागि जिल्ला प्रशासन कार्यालय प्युठानबाट पाँच दिनको म्याद थप गरेको नेपाल प्रहरीले आज जारी गरेको प्रेस विज्ञप्तिमा जनाइएको छ ।
