काठमाडौँ, १३ जेठ । भैरहवामा पौडी खेल्ने क्रममा डुबेर दुई जनाको मृत्यु भएको छ ।
जिल्ला प्रहरी कार्यालय रुपन्देहीका अनुसार मायादेवी गाउँपालिका–८ स्थित घाघरा खोलाको ड्याममा पौडी खेल्ने क्रममा डुबेर कक्षा ८ मा अध्ययनरत दुई विद्यार्थीको मृत्यु भएको हो ।
मृत्यु हुनेमा मायादेवी गाउँपालिका–६ खजुरिया स्थायी घर भई हाल सिद्धार्थनगर नगरपालिका–६ गल्लामण्डी बस्दै आएका १३ वर्षीय प्रिन्स चौधरी र सम्मरीमाई गाउँपालिका–६ असुरैना स्थायी घर भई हाल सिद्धार्थनगर–४ सुगरमिलमा डेरा गरी बस्दै आएका १६ वर्षीय सुरज गुप्ता छन् ।
उनीहरू साथी रहेको प्रहरीले जनाएको छ । गुप्ता भैरहवास्थित साई ग्लोबल माध्यमिक विद्यालयमा कक्षा ८ मा अध्ययनरत थिए भने चौधरी लिलाराम माध्यमिक विद्यालयमा कक्षा ८ मा अध्ययनरत थिए ।
प्रहरीका अनुसार डुबेको जानकारी प्राप्त हुनासाथ उद्धारका लागि प्रहरी टोली घटनास्थल पुगे पनि दुवै जनाको मृत्यु भइसकेको थियो । प्रहरीले डुबेकै अवस्थामा उनीहरूको शव बाहिर निकालेको जनाएको छ । भीम अस्पताल भैरहवामा पोस्टमार्टमपछि एक जनाको शव हिजै मंगलबार र अर्का एक जनाको शव आज परिवारले बुझेका छन् ।
