बुटवल, ३० चैत । लुम्बिनीका मुख्यमन्त्री जोखबहादुर महराले आज विश्वासको मत लिने भएका छन् ।
उनी यही चैत २३ मा मुख्यमन्त्री नियुक्त भएका थिए । प्रदेशसभामा ११ सदस्य रहेको माओवादी केन्द्रबाट मुख्यमन्त्री बनेका उनलाई एमाले, जसपा, एकीकृत समाजवादी र नागरिक उन्मुक्ति पार्टीको समर्थन छ ।
महरालाई एमालेका २९, नागरिक उन्मुक्तिका ४, जनता समाजवादी पार्टी (जसपा) ३, एकीकृत समाजवादी १ र स्वतन्त्र सांसद १ जनाले समर्थन गरेका थिए । मुख्यमन्त्रीमा समर्थन गर्ने बेलामै ७ बुँदे सहमति गर्दै मन्त्रालयको भागबण्डा गरिएको थियो । एमालेले ५, माओवादीले २, जसपाले २ मन्त्रालय पाउने र एकीकृत समाजवादी तथा स्वतन्त्रलाई पनि सरकारमा सहभागी गराउने सहमति छ ।
