काठमाडौँ, ५ असोज । १९ औँ एसियाली खेलकुद प्रतियोगितामा शुक्रबार भएको महिला फुटबलको आफ्नो पहिलो खेलमा नेपाली टोली पराजित भएको छ ।
समूह ‘डी’ अन्तर्गतको खेलमा भियतनामले नेपाललाई २-० गोलले पराजित गरेको हो । पहिलो हाफमा गतिलो प्रदर्शन गरेको नेपाली टोलीले दोस्रो हाफमा भने लय गुमाएको थियो । पहिलो हाफ गोलरहित बराबरीमा सकिएको थियो ।
नेपाली टोलीले दुबै गोल दोस्रो हाफमा १२ मिनेटको बीचमा खाएको थियो । भियतनामका लागि पहिलो गोल निर्धारित समयको ५३ औँ मिनेटमा फाम हि एनले गरेकी थिइन् । त्यसपछि निर्धारित समयको ६४ औँ मिनेटमा थुई बिच थी एनग्वेनले भियतनामका लागि दोस्रो गोल थपेकी थिइन् । नेपालको समूहमा बंगलादेश र जापान पनि रहेका छन् । नेपालले आफ्नो दोस्रो खेल सेप्टेम्बर २५ तारिखमा जापानसँग खेल्नेछ । समूहगत चरणको अन्तिम खेल नेपालले सेप्टेम्बर २८ तारिखमा बंगलादेशसँग खेल्नेछ ।
