पाँचथर, ३१ जेठ । पाँचथरमा कीर्ते कागजात बनाएर भारतीय नागरिकले नेपाली नागरिकता लिन खोजेको भन्दै प्रहरीले दुई जनालाई पक्राउ गरेको छ ।
प्रहरीका अनुसार फाल्गुनन्द गाउँपालिका–१ का ६४ वर्षीय गंगाप्रसाद आङदेम्बे र भारत असामका उनका झट्केलो छोरा २२ वर्षीय समित आङ्देम्बेलाई पक्राउ गरेको हो । उनीहरु नागरिकता बनाउन चाहिने विभिन्न कागजात पुर्याएर जिल्ला प्रशासन पुगेका थिए । जिल्ला प्रशासनका अनुसार उनीहरुले पटक/पटक नागरिकता बनाउनका लागि प्रयास गरेका थिए ।
गङ्गाकी श्रीमतीको पहिलो विवाह भारतीय नागरिकसँग भएको थियो । गङ्गासँग दोश्रो विवाह गरेकी उनको श्रीमतीको केही वर्ष अगाडि अङ्गीकृत नागरिकता बनेको थियो । झट्केलो छोरोलाई नागरिकता बनाउन विभिन्न प्रयास गरेपछि उनी पक्राउ परेका हुन् ।
