काठमाडौँ, १० जेठ । शेयर बजार काराेबार मापक नेप्से परिसूचक र कारोबार रकम दुवैमा आज नयाँ रेकर्ड कायम भएको छ ।
आज नेप्से परिसूचक ३ दशमलव ०७ अङ्कले बढेर २८ सय २३ दशमलव ०६ अङ्कमा पुगेर नयाँ रेकर्ड कायम भएको हो । यस्तै आज १३ अर्ब १७ करोड रुपैयाँभन्दा धेरैको शेयर कारोबार भएको छ । यो एक दिनमा अहिलेसम्मकै सबैभन्दा धेरै कारोबार हो ।
आज १३ अर्ब १७ करोड ५३ लाख रुपैयाँ बराबरका दुई करोड ७१ लाख कित्ता शेयर किनबेच भएको छ । यसअघिको ११ अर्ब ५५ करोड रुपैयाँको रेकर्ड आज एक हप्तामै तोडिएको हो । सबैभन्दा धेरै आज हाइड्रो इलेक्ट्रिसिटी इन्भेस्टमेन्ट एन्ड डेभलपमेन्ट कम्पनीको एक अर्ब २६ करोड रुपैयाँभन्दा धेरैको शेयर कारोबार भएको छ ।
आज वरुण हाइड्रोपावर, युनाइटेड मर्दी हाइड्रोपावर, माउन्टेन हाइड्रो र ग्रीन डेभलपमेन्ट बैंकको शेयर मूल्य झण्डै १० प्रतिशतले बढेको छ । एक्सेल डेभलपमेन्ट बैंक, गुडविल फाइनान्स र सेन्ट्रल फाइनान्सको शेयर मूल्य भने चार प्रतिशतभन्दा धेरैले घटेको छ ।
