काठमाडौँ, २९ मंसिर । आज सोमबार नेप्से ५६.७२ अंकले वृद्धि हुँदा २०६७.१७ अंकमा बन्द भएको छ ।
जुन यही मंसिर १७ गतेपछिकै उच्च हो । आज कारोबारमा पुनः उत्साह थपिँदा ७ अर्ब माथिको कारोबार भएको छ । सोमबार नेप्सेमा ५७ हजार ०८७ वटा कारोबारमा २०२ कम्पनीको १ अर्ब २८ करोड ८८ लाख ०६६ हजार कित्ता सेयर किनबेच हुँदा ७ अर्ब २० करोड ४१ लाख ३७ हजारको कारोबार भएको छ ।
कोभिड १९ को कारण बैंकहरुमा अधिक तरलता रहेको छ भने ब्याजदर कम हुँदा लगानीकर्ताको पुँजीको लागत घटेको छ । त्यस्तै बैंकहरुले बैंक तथा वित्तीय संस्थामा लगानी गर्न नपाउने नियामकीय व्यवस्थाका वित्तीय क्षेत्रबाहेकमा लगानी बढाउँदा बैंक तथा वित्तीय संस्थाबाहेक अन्य सूचीकृत कम्पनीको सेयर मूल्य बढेको छ । आइतबार बैंकिङ समूहका सूचकले केही बजार तानेपछि सोमबार लगानीकर्ता जीवन बिमा र लघुवित्तको साथै अन्य र निर्जीवन बिमातर्फ मोडिएका छन् ।
त्यस्तै व्यापार समूहका कम्पनीको पनि सेयर मूल्य बढेको छ । आज नेप्सेमा हाइड्रोपावरबाहेक सबै समूहको सूचकमा हरियाली देखिएको छ । व्यापार र जीवन बिमा समूहको सूचक ८ प्रतिशत माथिले वृद्धि हुँदा लघुवित्तको सूचक पनि ४.४३ प्रतिशतले बढेको छ । त्यस्तै निर्जीवन बिमा र अन्यको सूचक करिब ४ प्रतिशले बढेको छ । जसले गर्दा सबैभन्दा ठुलो हिस्सा रहेको बैंकिङ समूहको सूचक १.४९ प्रतिशतले बढे पनि नेप्से २.८२ प्रतिशतले बढेको छ । कारोबार रकममा बजारको नेतृत्व गरेको नेपाल लाइफ इन्स्यारेन्सको सेयर मूल्य ९.९८ प्रतिशतले वृद्धि भएर सर्किट लेभलमा बन्द भएको छ । कम्पनीको करिब ७५ करोडको सेयर किनेबेच भएको छ । त्यस्तै नेपाल पुनर्बिमाको ४६ करोड र नेशनल लाइफको ४२ करोड भन्दा माथिको सेयर किनबेच भएको छ ।
आज नेप्सेमा कारोबारमा आएकामध्ये १५ कम्पनीको सेयर मूल्य ९ देखि १० प्रतिशतले बढेको छ । जसमध्ये साल्ट ट्रेडिङ कर्पोरेसन र नारायणी विकास बैंकबाहेक अरु सबै बिमा र लघुवित्त कम्पनी छन् ।
