काठमाडौँ, ८ असोज । नुवाकोटमा भाइरल ज्वरो र टाइफाइडका बिरामी बढेका छन् ।
नुवाकोटको त्रिशूली अस्पताल लगायत अन्य स्वास्थ्य संस्थामा रुघाखोकी र भाइरल ज्वरोका बिरामी बढ्दै गएको स्वास्थ्यकर्मीले जनाएको छ ।
मौसम परिवर्तनसँगै संक्रमण बढेको हो । भाइरलबाट सबैभन्दा बढी बालबालिका र वृद्ध प्रभावित छन् । दुई सयभन्दा बढी बिरामीमध्ये ६० प्रतिशत बढी भाइरल ज्वरोका भएको अस्पतालले जनाएको छ ।
हल्का ज्वरो आउने, टाउको, घाँटी, हातखुट्टा दुख्ने, रुघाखोकी लाग्ने, वाकवाकी हुने, जीउ दुख्नेलगायत लक्षण भएका बिरामीको सङ्ख्या प्रतिदिन बढ्दै गएको अस्पतालले जनाएको छ ।