काठमाडौं, २ फागुन । प्रधानमन्त्री केपी शर्मा ओलीले राष्ट निर्माणको जिम्मेवारी दिएकोमा आभार व्यक्त गर्दै राजनीतिक स्थिरता भएकाले समृृद्धिको आधार तयार भएको बताएका छन् ।
आज देशवासीका नाममा सम्बोधन गर्दै प्रधानमन्त्री ओलीले देश समृद्धिको बाटोमा हिँडिसकेको बताउदै यो एक वर्षमा समृद्धिको आधार तय भएको बताएका हुन ।
उनले आफ्नो पहिलो बर्षको कार्यकालमा विकास निर्माण, संघीयता कार्यान्वयन, कर्मचारी समायोजन, संविधान अनुसार मौलिक हकको कार्यान्वयनलगायतका काम गर्न सफल भएको बताए ।
प्रधानमन्त्रीले २५ कानुन पारित, २३ विधेयक विचाराधिन २४ विधेयक प्रस्तुत भएको र लगानी मैत्री वाताबरणका लागि ऐन परिमार्जनको तयारी भएको बताएका छन् ।
त्रिवि विमानस्थल २४ घण्टा सञ्चालन तथा अन्य विमानस्थलहरु पोखरा, लुम्बिनी, तथा निजगढ विमानस्थलको निर्माण तथा सञ्चालन गर्न तीव्र तयारी भएको र ८७ वटा पुल, ४१७ झोलुङगे पुल बनाएको, तथा जयनगर जनकपुर रेल सेवा सञ्चालनको काम भएकाले विकासले तीव्रता पाएको प्रधानमन्त्रीको भनाई रहेको छ ।
प्रधानमन्त्री ओलीले सरकार लोकतन्त्रप्रति प्रतिवद्ध रहेको भन्दै कसैले अधिनायकवाद भनेर प्रचार गर्दै हिँड्नुलाई ध्यान बराल्ने काम बाहेक केही नभएको बताए । ‘अहिले लोकतन्त्र फैलिएको र फैलिदैँ गएको अवस्थामा छ, कसैले फैलदै गरेको लोकतन्त्र खुम्चिएको देख्छ भने त्यसको दृष्टिदोष मात्रै हो’, उनले भने ।
