एजेन्सी, ११ कार्तिक । अफ्रिकामा इबोलाको प्रकोप फैलिरहेका बेला प्रजातान्त्रिक गणतन्त्र कंगो (डीआरसी) मा यस रोगबाट संक्रमित हुनेको संख्या १० हजार नाघेको छ ।
स्वास्थ्य अधिकारीहरूले मंगलबार सार्वजनिक गरेको तथ्यांकअनुसार, मे महिनामा प्रकोप सुरु भएयता अक्टोबर २५ सम्ममा १० हजार ६० जनामा संक्रमण पुष्टि भएको छ भने चार हजार ८८७ जनाको मृत्यु भएको छ ।
यसअनुसार संक्रमण पुष्टि भएकामध्ये मृत्युदर ४८ दशमलव ६ प्रतिशत रहेको छ । यो प्रकोप कंगोका २६ प्रान्तमध्ये आठ प्रान्तका ६६ स्वास्थ्य क्षेत्रमा फैलिएको प्रतिवेदनमा उल्लेख छ । पूर्वी प्रान्त इतुरी यस प्रकोपको मुख्य केन्द्र बनेको छ, जहाँ कुल संक्रमितमध्ये ७१ दशमलव सात प्रतिशत रहेका छन् ।
बुन्दिबुग्यो प्रजातिको इबोला भाइरसका कारण फैलिएको प्रकोपबारे कंगोले मे १५ मा घोषणा गरेको थियो । त्यसयता यो प्रकोप पाँच देशमा देखिएको छ । कंगोबाहेक युगान्डा, केन्या र नाइजेरियामा पनि संक्रमण फैलिएको छ भने फ्रान्समा बाहिरबाट भित्रिएको एक संक्रमणको घटना पुष्टि भएको थियो ।
इबोला भाइरसको बढी परिचित जाइरे प्रजातिभन्दा फरक, बुन्दिबुग्यो प्रजातिका लागि हालसम्म स्वीकृत खोप वा विशिष्ट उपचार उपलब्ध छैन ।
यो प्रकोप प्रजातान्त्रिक गणतन्त्र कंगोको इतिहासकै सबैभन्दा ठूलो र घातक इबोला प्रकोप बनेको प्रतिवेदनमा उल्लेख छ । सन् २०१४ देखि २०१६ सम्म पश्चिम अफ्रिकामा फैलिएको महामारीपछि यो विश्वकै दोस्रो ठूलो इबोला प्रकोप भएको जनाइएको छ । सिन्ह्वा
