काठमाडौँ, २४ असोज । नेपाली कांग्रेसको इतर समूहको १५ औँ महाधिवेशन आयोजक समितिका संयोजक डा. शशाङ्क कोइरालाले राजनीतिमा सत्यमा रहेर मात्र नपुग्ने भन्दै सत्यमा रहँदा आउने मूल्य चुकाउनसमेत तयार हुनुपर्ने बताएका छन् ।
काठमाडौँ जिल्लाको क्षेत्र नम्बर ४ को क्षेत्रीय अधिवेशन उद्घाटन गर्दै उनले आफूलाई लागेको विश्वासमा अडिग रहन सक्नु नै राजनीतिको मुख्य आधार मान्नुपर्ने बताएका छन् । डा. कोइरालाले मूल्य-मान्यता, विधि र पद्धतिको राजनीति पछि पर्दै सत्ता, शक्ति र पैसा राजनीतिमा हाबी हुँदा चुनावहरू क्रमशः महँगो बन्दै गएकोप्रति चिन्ता व्यक्त गरे।
उनले राजनीति सत्ताको भागबण्डाका लागि नभई जनताको सेवाका लागि भएको स्पष्ट पारे। सत्ताको दुरुपयोग गर्ने व्यक्तिहरू राजनीतिमा आउन नहुने उनको भनाइ छ।
