काठमाडौँ, २० फागुन । नेपाललाई आवश्यक पर्नेमध्ये करिब आधा औषधिहरु आयात हुने गरेको औषधि व्यवस्था विभागले जनाएको छ ।
विभागका अनुसार नेपाललाई आवश्यक पर्नेमध्ये ५० प्रतिशत औषधि भारत तथा तेस्रो देशबाट आयात हुने गरेको छ ।
सामान्य भिटामिनहरु, ईन्जेक्सन, एन्टीडाईबेटिक, नार्कोटिक, साईक्रोटिकजस्ता औषधि नेपालमा उत्पादन हुने गरेको छ । दम, क्यान्सरजस्ता दीर्घ तथा गम्भीर रोगका लागि आवश्यक पर्ने औषधिहरु भने विदेशबाट आयात गर्ने गरिएको छ ।
नेपालमा करिब ८ हजार किसिमका औषधि उत्पादन भइरहेका छन् । करिब ९ हजार किसिमका औषधिहरु आयात भइरहेको औषधि व्यवस्था विभागको तथ्याङ्क छ । कच्चा पदार्थ, प्रविधि र उपकरण बाहिरबाट ल्याउनु पर्ने कारण औषधि उत्पादनमा समस्या हुने गरेको विभागको बुझाइ छ ।
नेपालमा उत्पादन हुने औषधिका लागि ८० प्रतिशत कच्चा पदार्थ भारत र २० प्रतिशत चीनबाट आयात हुने गरेको छ । उत्पादक कम्पनीहरुले एउटै प्रकारका औषधि उत्पादनमा जोड दिँदा आयात बढेको अनुमान छ ।
