काठमाडौँ, १९ कार्तिक । यो वर्ष अक्टोबर अन्तिमसम्म डेंगु संक्रमितको संख्या ४४ हजार नाघेको छ । जाडोयाम सुरु भएपनि डेंगुको जोखिम कायमै रहेको विज्ञहरू बताउँछन् । गतवर्ष सन् २०२२ मा कुनैपनि महिनामा डेंगी शून्यमा झरेको थिएन ।
इपिडिमियोलोजी तथा रोग नियन्त्रण महाशाखा (ईडीसीडी)को तथ्यांकअनुसार जनवरीयता १ नोभेम्बरसम्म ४४ हजार ८४ जना संक्रमित भएका छन् । डेंगुका कारण जुलाईयता २० जनाको मृत्यु पुष्टि भएको छ ।
जुलाईयता उच्च बनेको डेंगी संक्रमण नोभेम्बर मध्यसम्म बढ्नसक्ने ईडीसीडीको आँकलन छ । यसअघिका दुई महिनामा उच्च नभए पनि संक्रमितको संख्या थपिने देखिन्छ ।
जाडो बढ्दै गए पनि लामखुट्टेको वृद्धि विकासमा कमी नआएकाले डेंगीको जोखिम कम नभएको विज्ञहरू बताउँछन् । डेँगी ’एडीस एजिप्टी’ र ’एडिस एल्बोपिक्टस’ प्रजातिका पोथी लामखुट्टेको अन्डा ६ महिनादेखि एक वर्षसम्मपनि प्रजननयोग्य अवस्थामा रहनसक्छ ।
