(जेष्ठ ३०, सुर्खेत) । कर्णाली प्रदेश सरकारले असार एक गते ल्याउने आर्थिक वर्ष २०७५र७६ का लागि २३ अर्ब बराबरको बजेट ल्याउने तयारीसँगै प्रदेशको राजश्व आफै संकलन गर्ने भएको छ ।
प्रदेश सरकारले प्रादेशिक गौरवसहित महत्वपूर्ण योजनाहरुमा बजेट विनियोजन गर्ने गरी बजेट तथा केन्द्रीय सरकारले कर्णाली प्रदेशलाई पठाउने सशर्त अनुदान र प्रदेश आफैले राजश्व संकलन गर्ने लक्ष्यका साथ बजेटको तयारी गरेको आर्थिक मामिला तथा योजना मन्त्री प्रकाश ज्वालाले जानकारी दिएका छन् ।
संघीय सरकारले प्रदेश सरकारलाई दिने वित्तीय समानिकरण अनुदान ९ अर्ब १३ करोड, राजश्व बाँडफाँडबाट प्राप्त करिब ५ अर्ब ५१ करोड र सशर्त अनुदानबाट ६ अर्ब ६१ करोड र प्रदेशको आन्तरिक स्रोतबाट करिब ५० करोड र चालु आर्थिक वर्षको बाँकी करिब ५० करोड बजेट गरी करिब २३ अर्बको बजेट ल्याउने तयारी गरेको हो ।
आगामी वर्षको बजेट कर्णाली प्रदेशका प्रत्येक स्थानीय तह, निर्वाचन क्षेत्रमा राम्रो देखिने निश्चित महत्वपूर्ण योजना र जनताको उत्पादन र रोजगारी केन्द्रित हुन्छ मन्त्री ज्वालले बताएका छन् ।
मन्त्री ज्वालाले कर्णाली हिजोका दिनमा उपेक्षित भएकाले अब त्यो स्वीकार्न नहुने भन्दै केन्द्र सरकारसँग आगामी दिनहरुमा धेरै भन्दा धेरै बजेट ल्याउने प्रयास गर्ने बताएका छन् ।
