धरान, २५ चैत । धरानमा तीनजनामा डेंगुको संक्रमण देखिएको छ ।
धरानको वीरेन्द्र मेडिकल हलमा स्वास्थ्य परीक्षण गर्न आएका धरान उपमहानगरपालिका–१२ का ५४ वर्षीय एक महिला र वडा नम्बर १५ का १९ वर्षीय एक युवकमा डेंगु भेटिएको डा. सुरेन्द्र यादवले जानकारी दिए । यसअघि धरानको सन्ध्या इन होटेलका चालकमा पनि डेंगु सङ्क्रमण भेटिएको थियो। अहिले उनी निको भई सकेका छन् ।
डेंगु एक प्रकारको ज्वरो हो । यो लामखुट्टेको टोकाइबाट सर्ने संक्रामक रोग हो डेंगुको भाइरसद्वारा सङ्क्रमित भएको एडिस एजिप्टाई जातको पोथी लामखुट्टेले यो रोग सार्दछ । गत वर्ष धरानमा महामारी कै रूप देखिएको डेंगु गर्मियाम सुरु भएसँगै पुनः देखिन थालेको धरान उपमहानगरपालिकाका स्वास्थ्य महाशाखाका वरिष्ठ कविराज रामबाबु यादवले बताए । स्वास्थ्यकर्मीहरुका अनुसार डेंगु लाग्दा आँखा रातो हुने र दुख्ने, टाउको, पेट, जोर्नी र मांसपेशी दुख्ने, आलस्य हुने जस्ता लक्षणहरू देखा पर्छन् ।
