काठमाडौँ, १७ कार्तिक । नेपाली कम्युनिस्ट पार्टी (नेकपा)का संयोजक पुष्पकमल दाहाल ‘प्रचण्ड’ले विगतमा सहकार्य गरेका सबै कम्युनिस्ट पार्टीलाई एकताबद्ध हुन आह्वान गरेका छन् ।
आज पेरिसडाँडामा आयोजित पार्टी एकता घोषणा कार्यक्रममा बोल्दै प्रचण्डले केपी शर्मा ओली, मोहन वैद्य ‘किरण’ र नेत्रविक्रम चन्द ‘विप्लव’ लगायतका नेतृत्वमा रहेका कम्युनिस्ट समूहलाई पनि एकताबद्ध गर्नुपर्ने बताएका हुन् ।
उनले देश असाधारण संकटबाट गुज्रिरहेको भन्दै कम्युनिस्ट मात्र नभई देशभक्त र लोकतन्त्रवादी शक्तिबीचको एकता पनि ऐतिहासिक आवश्यकता बनेको बताए ।
उनले भने, “विगतमा हामीले एकता गर्यौँ । थुप्रै उतारचढावहरू भोग्यौँ । आज देश असाधारण संकटमा छ । यो बेला हामी सबैले आफ्नो सोचाइ, बुझाइ र भावनालाई अझ फराकिलो गर्नुपर्ने अवस्था आएको छ,” ।
सबैखाले आग्रह, पूर्वाग्रह र संकीर्णताबाट मुक्त भएर राष्ट्रलाई प्राथमिकतामा राख्दै एकताबद्ध हुनुपर्ने उनको भनाइ छ ।
