काठमाडौँ, २१ असोज । गण्डकी प्रदेशका मुख्यमन्त्री एवं नेपाली कांग्रेसका नेता सुरेन्द्रराज पाण्डेले पार्टीलाई नयाँ पुस्ताको जोस-जाँगर र पुरानो पुस्ताको अनुभव मिलाएर अघि बढाउनुपर्ने बताएका छन् ।
नेपाल तरुण दलले आयोजना गरेको कार्यक्रममा बोल्दै उनले नयाँ र पुरानो पुस्ताको संयोजनले मात्र कांग्रेसलाई फेरि सशक्त, गतिशील र आगामी चुनौतीहरू सामना गर्न सक्ने बनाउने विचार व्यक्त गरेका हुन् ।
कांग्रेसको अधिवेशनमा उपसभापति पदमा उम्मेदवारी दिएका पाण्डेले पार्टीभित्रका सबै पक्षलाई समेटेर एकताबद्ध बनाएर लैजानु अहिलेको प्रमुख आवश्यकता भएकोमा जोड दिए। उनले भने, ‘अहिले हामीले पार्टीलाई नयाँ पुस्ताको जोस-जाँगर र पुराना साथीहरूको अनुभवलाई संयोजन गरेर नेपाली कांग्रेसलाई फेरि सशक्त, गतिशील र आगामी दिनको चुनौती सामना गर्न सक्ने पार्टी निर्माण गर्नुपर्ने अवस्था छ।’
आफूले लामो समयदेखि पार्टी तथा भ्रातृ संगठनमा निरन्तर काम गर्दै आएको प्रसङ्ग उल्लेख गर्दै पाण्डेले आफ्ना एजेन्डा र उम्मेदवारीलाई सहयोग गर्न सबैलाई आग्रह गरे।
