काठमाडौँ, ६ भदौ । पहिरोका कारण पोखरा–सिक्लेस सडक अवरुद्ध भएको छ ।
गएरातिदेखिको अविरल वर्षाका कारण कास्कीको मादी गाउँपालिका–१, पदुखोला क्षेत्रमा पहिरो खस्दा सडक अवरुद्ध भएको हो ।
मादी–१ का वडाध्यक्ष देवीजंग गुरुङका अनुसार आज बिहान खिलाङ र पार्चेबीचको पदुखोला क्षेत्रमा पहिरो खस्दा पर्यटकीय गाउँ सिक्लेस जाने बाटो बन्द भएको हो । मादी गाउँपालिकाको पहलमा निर्माण गरिएको पदुखोलाको रेलिङ तथा ढलान क्षति भएको छ ।
पहिरो पन्छाएर सडक सञ्चालनमा ल्याउन सरोकार भएका निकायसँग आवश्यक समन्वय भइरहेको छ ।
सडक खुलाउन केही समय लाग्न सक्ने भएकाले सिक्लेस जाने पर्यटकलाई आइतबारसम्म यात्राको योजना नबनाउन वडाध्यक्ष गुरुङले आग्रह गरे ।
