काठमाडौँ, २७ साउन । नेपालमा स्मार्ट प्रविधिको प्रयोग दैनिक जीवनमा तीव्र रूपमा विस्तार भइरहेका बेला खुद्रा व्यापार क्षेत्र पनि डिजिटल र स्वचालित प्रणालीतर्फ अग्रसर हुन थालेको छ। उपभोक्ताको बदलिँदो जीवनशैली र सहज किनमेलको बढ्दो मागसँगै स्मार्ट भेन्डिङ मेसिनहरू नेपाली बजारमा नयाँ सम्भावनाका रूपमा देखिन थालेका छन्।
विगतमा पेय पदार्थ, खाजा तथा दैनिक उपभोग्य सामग्री खरिदका लागि उपभोक्ता मुख्यतः परम्परागत पसल र म्यानुअल सेवामा निर्भर थिए। तर अहिले छिटो, सहज र स्व(सेवा ९सेल्फ–सर्भिस० प्रणालीमार्फत किनमेल गर्ने प्रवृत्ति बढ्दै गएको छ। यसले स्मार्ट भेन्डिङ मेसिनको प्रयोगलाई विस्तार गर्ने वातावरण सिर्जना गरेको छ।
नेपालमा डिजिटल भुक्तानी प्रणालीको तीव्र विस्तार, शहरीकरण, व्यावसायिक केन्द्रहरूको वृद्धि तथा तत्काल उपभोग गर्ने संस्कृतिले पनि स्मार्ट भेन्डिङ मेसिनका लागि बजार विस्तारको आधार तयार गरिरहेको छ। क्यूआर कोड, मोबाइल वालेट र अन्य डिजिटल माध्यमबाट सहज भुक्तानी गर्न सकिने भएकाले यस्ता मेसिनहरू उपभोक्तामाझ थप आकर्षक बन्दै गएका छन्।
विशेषगरी शपिङ मल, कार्यालय परिसर, शैक्षिक संस्था, अस्पताल, होटल तथा अन्य बढी आवागमन हुने स्थानहरूमा स्मार्ट भेन्डिङ मेसिनको प्रयोग विस्तार हुने अपेक्षा गरिएको छ। यसले व्यवसायीलाई २४सै घण्टा सेवा उपलब्ध गराउने अवसर दिनुका साथै सञ्चालन लागत घटाउन पनि सहयोग पुग्ने विश्वास गरिएको छ।
स्मार्ट खुद्रा प्रणालीको विस्तारसँगै नेपालको अफलाइन खुद्रा बजार थप आधुनिक, डिजिटल र उपभोक्तामैत्री बन्ने अपेक्षा गरिएको छ। यसले उपभोक्तालाई छिटो, सुरक्षित र सुविधाजनक किनमेल अनुभव प्रदान गर्नुका साथै देशको खुद्रा व्यापारलाई नयाँ चरणमा प्रवेश गराउने विश्वास गरिएको छ।
