काठमाडौँ, २७ साउन । प्रहरीले त्रिभुवन अन्तर्राष्ट्रिय विमानस्थलबाट १८ केजी गाँजा बरामद गरेको छ ।
प्रहरीका अनुसार गएराति भारतीय नागरिकहरुले थाइल्याण्डको बैंककबाट हङकङ ट्रान्जिट भएर सो गाँजा ल्याएका हुन् । गाँजा लिएर आएका २ जना भारतीय नागरिकलाई पक्राउ गरिएको हो ।
पक्राउ पर्नेमा क्याथे प्यासिफिकको उडान हुँदै आएका भारत पन्जाब घर भएका ३६ वर्षीय सन्जिभकुमार र २६ वर्षीय रविकुमारलाई लागुऔषध नियन्त्रण ब्युरोको टोलीले पक्राउ गरेको हो ।
आरोपीहरूले प्रहरीलाई झुक्याउन बैङ्ककबाट हङकङ पुगेर नेपाल ओर्लिएको प्रहरीको अनुसन्धानले देखाएको छ । बैङ्ककबाट सिधै आउँदा निगरानीमा पर्ने भएपछि उनीहरू हङकङबाट आएको बताइएको छ ।
आरोपीहरूमाथि ब्युरोले लागुऔषध सम्बन्धी कसुरमा अनुसन्धान गरिरहेको छ । थाइल्याण्डबाट गाँजा ओसारपसार गर्नेहरूले पक्राउबाट बच्न आगमन तर्फको भन्सार एरियामा लगेज छाडेर केही दिन पछि एजेन्ट मार्फत लगेज दाबी गरेर लैजाने गरेको भेटिएको छ ।
