काठमाडौँ, १३ साउन । अर्घाखाँचीको मालारानी गाउँपालिका–६ साकिन्धारामा बाँदर धपाउने क्रममा भरुवा बन्दुक पड्किँदा एक युवक घाइते भएका छन् ।
घाइते हुनेमा स्थानीय ३० वर्षीय विष्णु थापा छन् । जिल्ला प्रहरी कार्यालय अर्घाखाँचीका प्रमुख दिवस जिसीका अनुसार मंगलबार दिउँसो साढे १ बजे थापा आफ्नै बारीमा मकैबाली जोगाउन बाँदर लखेट्न लोड गरिएको भरुवा बन्दुक बोकेर हिँडिरहेका थिए। बारीको डिलमा चिप्लिँदा बन्दुक पड्किएको थियो ।
बन्दुक पड्किँदा थापाको दायाँ हातको पञ्जामा गम्भीर चोट लागेको प्रहरीले जनाएको छ । घाइते थापाको बुटवलस्थित एडमन सिटी अस्पतालमा उपचार भइरहेको छ । प्रहरीले घटनामा प्रयोग भएको भरुवा बन्दुक जफत गरेको छ । घटनाबारे थप अनुसन्धान भइरहेको प्रहरी प्रमुख जिसीले जानकारी दिएका छन् ।
