रोल्पा, २४ असार । रोल्पाको त्रिवेणी गाउँपालिका–७ गाइबिसौनास्थित घोराही–घर्तीगाउँ सहिदमार्गमा यात्रुवाहक बस दुर्घटना हुँदा एक दर्जनभन्दा बढी यात्रु घाइते भएका छन् ।
प्रहरीका अनुसार बुधबार दिउँसो घर्तीगाउँबाट काठमाडौँतर्फ जाँदै गरेको राप्ती यातायात प्रालिको लु२ख २९६६ नम्बरको बस ओरालोमा ब्रेक फेल भएपछि सडकमै पल्टिएको हो ।
प्रहरी र स्थानीयसहितको टोलीले बसमा सवार करिब २२–२५ यात्रुमध्ये १३–१४ जनाको उद्धार गरेको थियो। घाइतेहरूको नुवागाउँस्थित स्वास्थ्य चौकीमा उपचारका लागि पठाइएको प्रहरीले जनाएको छ । दुर्घटनापछि केही समय अवरुद्ध बनेको सडक अहिले एकतर्फी सञ्चालनमा ल्याइएको प्रहरीले जनाएको छ । दुर्घटनाको कारण र क्षतिको थप अनुसन्धान भइरहेको छ ।
