काठमाडौँ, २४ असार । जिल्ला प्रहरी परिसर काठमाडौँले ठूलो परिमाणको काठको अवैध कोइलासहित दुई जना मानिस र एउटा ट्रकलाई नियन्त्रणमा लिएको छ ।
मंगलबार बेलुकी काठमाडौँ जिल्लाको चन्द्रागिरि नगरपालिका वडा नं. २ स्थित नागढुङ्गा चेक प्वाइन्टमा प्रहरीले उनीहरूलाई समातेको हो । कपिलवस्तुबाट काठमाडौँतर्फ आउँदै गरेको बा प्र.०१–००७ ख ०५९२ नम्बरको ट्रकलाई प्रहरी प्रभाग नागढुङ्गाबाट खटिएको प्रहरी टोलीले रोकेर चेकजाँच गरेको थियो । उक्त ट्रकमा जाँच गर्ने क्रममा बिना इजाजत ओसारपसार गरिएको ६ टन ९५० केजी अवैध काठको कोइला फेला परेको प्रहरीले जनाएको छ ।
बरामद गरिएको उक्त कोइलाको बजार मूल्य अन्दाजी ५ लाख ५६ हजार रुपैयाँ बराबर रहेको छ । अवैध कोइलासहित प्रहरीले दाङ जिल्लाको घोराही उपमहानगरपालिका वडा नं. ७ बस्ने ३६ वर्षका शिवराज चौधरी र कपिलवस्तु जिल्लाको विजय गाउँपालिका वडा नं. ३ बस्ने २६ वर्षका कमल किशोर केवटलाई नियन्त्रणमा लिएको काठमाडौँका प्रवक्ता एवं सूचना अधिकारी, प्रहरी उपरीक्षक पवन कुमार भट्टराईले जानकारी दिएका छन् ।
