काठमाडौँ, १२ बैशाख । कालीगण्डकी नदीले बगाउँदा आज एक बालकको मृत्यु भएको छ ।
प्रहरीका अनुसार मुस्ताङको बारागुङ मुक्तिक्षेत्र गाउँपालिका–४, कागबेनी श्राद्धस्थलनजिकबाट नदीले बगाउँदा आठ वर्षीय बालक बरुण गौलीको मृत्यु भएको हो ।
सुर्खेतको वीरेन्द्रनगर नगरपालिका–५ की ३२ वर्षीय विमला गौलीसहित १२ जनाको टोली शनिबार कागबेनीमा श्राद्ध गर्न पुगेको थियो । उक्त स्थानमा दिवंगत पितृका नाममा श्राद्ध गर्ने क्रममा गौलीका आठ वर्षीय छोरा बरुण अचानक नदीमा बेपत्ता भएका थिए ।
हराएका बालकको चप्पल कालीगण्डकी खोलाको छेउमा फेला परेको भन्ने सूचनापछि सुरक्षाकर्मीको टोलीले खोजी सुरु गरेको थियो ।
त्यसक्रममा श्राद्धस्थलदेखि एक किलोमिटर दक्षिण कालीगण्डकी नदी किनारामा बालक अचेत अवस्थामा फेला परेका थिए । उनलाई उपचारका निम्ति प्रदेश अस्पताल जोमसोम पठाइएकामा चिकित्सकले मृत घोषणा गरेको हो ।
उक्त घटनाबारे ठप अनुसन्धान भइरहेको प्रहरीले जनाएको छ ।
