काठमाडौँ, १८ फागुन । निर्वाचन आयोगले निर्वाचन आचारसंहीता कार्यान्वयनमा कडाइ गर्दै अनुगमन अधिकृतहरूलाई सुक्ष्म निगरानी गर्न निर्देशन दिएको छ ।
आज आयोगका प्रवक्ता नारायणप्रसाद भट्टराईले निर्वाचन आचारसंहिताको दफा ३२ बमोजिम तोकिएका अनुगमन अधिकृतहरूलाई आफ्नो जिम्मेवारी कडाइका साथ पालना गर्न निर्देशन दिइएको बताए।
प्रवक्ता भट्टराईकाअनुसार अनुगमन अधिकृतहरूलाई जिल्लाभित्र सुक्ष्म अनुगमन गर्न र निर्वाचन (कसुर तथा सजाय) ऐन, २०७३ विपरीतका कार्यहरू पाइएमा तत्काल कानूनी कारबाहीको प्रक्रिया अगाडि बढाउन अधिकार प्रत्यायोजन गरिएको बताए ।
जिल्ला आचारसंहिता अनुगमन समितिसँगको सहकार्यमा अनुगमनकर्ताको अधिकार प्रयोग गरी आचारसंहिता उल्लंघन गर्ने जोसुकैलाई पनि कारबाहीको दायरामा ल्याइने आयोगले स्पष्ट पारेको छ । फागुन २१ गते हुने प्रतिनिधि सभा सदस्य निर्वाचनलाई स्वच्छ र निष्पक्ष बनाउन निर्वाचन आचारसंहिता, २०८२ को प्रभावकारी कार्यान्वयनका लागि जोड दिएको बताए ।
आयोगले सहायक प्रमुख जिल्ला अधिकारी र कोष तथा लेखा नियन्त्रक कार्यालयका प्रमुखहरूलाई फरक–फरक कार्य जिम्मेवारीसहित अनुगमन अधिकृत तोकेको जानकारी दिए ।
