काठमाडौँ, १५ भदौ । गृहमन्त्री रमेश लेखकले पर्साको वीरगन्जस्थित विभिन्न अस्पतालमा उपचाररत हैजा संक्रमित बिरामीको स्वास्थ्य अवस्थाबारे जानकारी लिएका छन् ।
स्वास्थ्य उपचारमा भइरहेको प्रयासबारे पनि उनले जानकारी लिएका गृह मन्त्रालयले जनाएको छ ।
उनले नारायणी, तराई अस्पताल र वीरगन्ज हेल्थकेयरमा उपचाररत बिरामीको स्वास्थ्य अवस्थाबारे जानकारी लिएका हुन् । शनिबार साँझ उनी वीरगन्ज पुगेका थिए ।
गृहमन्त्री लेखकले वीरगन्जमा फैलिएको हैजा महामारी नियन्त्रणका निम्ति नेपाली सेनासहित तीनै सुरक्षा निकायका जनशक्ति खटाइने बताए । महामारी नियन्त्रणका निम्ति सरकार गम्भीर रहेको उनले उल्लेख गरे । अस्पताल प्रशासनबाट माग भए सुरक्षा निकायबाट तत्काल जनशक्ति र औषधि उपलब्ध गराइने उनको भनाइ थियो ।
हैजा पूर्ण रूपमा नियन्त्रणमा ल्याउन सरकारले विशेषज्ञसँग सल्लाह गरेर मूल कारण पहिचान गर्नुपर्नेमा उनले जोड दिए ।
