दाङ, २० असोज । दाङमा श्रीमान श्रीमती मृत अवस्थामा फेला परेका छन् ।
इलाका प्रहरी कार्यालय तुलसीपुरका अनुसार सल्यानको त्रिवेणी गाउँपालिका ४ फालाबाङ घर भइ अहिले दाङको तुलसीपुर ९ बेलुवामा कोठा भाडामा बस्दै आएका अन्दाजी २५ वर्षीय सुशील भण्डारी र उनकी २१ वर्षीया श्रीमती पवित्रा डाँगी भण्डारी मृत फेला परेका हुन् ।
आज बिहान १० बजेको समयमा ढोका बन्द गरेको अवस्थामा कोठाभित्रै दुवैजना मृत फेला परेका हुन् । श्रीमान पङ्खामा झुन्डिएको अवस्थामा र श्रीमती खाटमा मृत फेला परेको प्रहरीले जनाएको छ ।
सुशीलले श्रीमतीको हत्या गरी आफूले पनि आत्महत्या गरेको हुन सक्ने प्रहरीको प्रारम्भिक अनुसन्धानले देखाएको छ । प्रहरीका अनुसार पवित्राको शरीरमा चोट देखिए पनि धारिलो हतियार भने प्रयोग नभएको पाइएको छ । मृतकको शव पोस्टमार्टमका लागि राप्ती प्रादेशिक अस्पताल तुलसीपुरमा राखिएको र घटनाबारे थप अनुसन्धान भइरहेको प्रहरीले जनाएको छ ।
