काठमाडौँ, २ असोज । नेकपा एमालेका अध्यक्ष केपी शर्मा ओलीले संविधान सभाका अध्यक्ष स्व. सुवासचन्द्र नेम्वाङले चौतर्फी दवावकाबीच पनि संविधान जारी गर्न सफल भएको बताएका छन् । नेम्वाङको सोही राष्ट्रवादी सोचका कारण नेम्वाङमा देशप्रतिको असाधारण निष्ठा रहको अध्यक्ष ओलीको भनाइ छ ।
मंगलबार एमालेले आयोजना गरेको ‘सुवास र संविधान’ विषयक विचार गोष्ठीलाई सम्बोधन गर्दै पूर्व प्रधानमन्त्री समेत रहेका ओलीले नेम्वाङको लामो राजनीतिक इतिहासमा कहिल्यै पनि असान्दर्भिक र स्वार्थी कदम नचालेको भन्दै उहाँबाट नेपाली राजनीतिले धेरै कुरा सिक्नुपर्ने बताए । ‘उहाँ वेइमान हुनुभएन, मिठो बोल्ने भन्दा पनि देशप्रति असाधारण निष्ठा थियो । देशहित विपरीतका कहिल्यै कुनै कदम चाल्नुभएन’, ओलीले भने, ‘असामूहिक, असान्दर्भिक र स्वार्थी कदमहरु कहिल्यै चाल्दै चाल्नुभएन ।’
उनले नेम्वाङले संविधान निर्माण र जारी गर्न प्रभावकारी र अभिभावकीय भुमिका निर्वाह गरेकै कारण संविधान जारी हुन सकेको बताए । उनले संविधान सभा अध्यक्ष सुवासचन्द्र नेम्वाङ, तत्कालीन राष्ट्रपति रामवरण यादव र मस्यौदा समितिका सभापति कृष्ण सिटौलाजीलाई संविधान जारी नगर्न दबाब दिएको बताए । ‘२०७२ साल असोज ३ गते संविधान जारी गर्ने बेलामा कृष्णप्रसाद सिटौलाजीलाई पनि ठुलो दबाब थियो’, उनले भने, ‘कांग्रेसका नेता मार्फत मस्यौदा नबुझाऊ भनेर ।’
