धनगढी, २ चैत । सुदूरपश्चिम प्रदेशमा पछिल्ला दिनमा कोरोनाभाइरसको संक्रमण पुनः देखिन थालेको छ । कोरोनाभाइरसको संक्रमण दर केही महिनायता प्रदेशमा शून्य थियो ।
स्वास्थ्य निर्देशनालय दिपायलले पछिल्लो २४ घण्टामा ६ जनामा कोरोनाको संक्रमण देखिएको जनाएको छ । यो तथ्यांकमा केही दिनअघिका कोरोना संक्रमितको संख्या समेत समेटिएको निर्देशनालयले जनाएको छ । पछिल्लो २४ घण्टामा ३९१ जनाको एन्टिजेन विधिबाट कोरोनाभाइरसको नमुना परीक्षण गरिएको थियो । कोरोनाको संक्रमण दर केही बढे पनि रोगले हुने मृत्यु दर शून्य छ ।
निर्देशनालयका कोभिड–१९ सम्पर्क व्यक्ति हेमराज जोशीले रोगको रोकथामका लागि सबै जिल्लामा कोरोनाभाइरसविरुद्धको बुस्टर डोज (खोपको मात्रा) स्वास्थ्य संस्थामार्फत लगाउन थालिएको जानकारी दिए । सरकारले कोभिड–१९ विरुद्धको पूर्ण मात्राको खोप लगाएको तीन महिना पूरा भएका र पहिलो बुस्टर खोप लगाउन छुटेका व्यक्तिलाई पहिलो मात्रा बुस्टर खोप र यसअघि पहिलो बुस्टर मात्रा खोप लगाएको ६ महिना पूरा भएका व्यक्तिलाई दोस्रो बुस्टर मात्रा खोप दिन लागिएको छ ।
स्वास्थ्यकर्मी, गर्भवती, १२ वर्षमाथिका दीर्घरोगी, रोग प्रतिरोधात्मक क्षमता कम भएका र ५५ वर्षमाथिका सबै नागरिकलाई बुस्टर खोप लगाउन मिल्ने बताइएको छ । कोरोनाको संक्रमण भएकाले संक्रमणमुक्त भएको एक महिनापछि यो बुस्टर डोज लगाउन पाइन्छ । कोरोनाभाइरसको समस्या देखिएयता हालसम्म सुदूरपश्चिममा ६ लाख ३९ हजार ४८८ को नमुना परीक्षण गरिएको छ । यीमध्ये ६१ हजार ८९० जनामा कोरोनाभाइरसको संक्रमण पुष्टि भएको छ । रासस
