कोपेनहेगन, २८ माघ । विश्व स्वास्थ्य संगठन (डब्लूएचओ) युरोपको क्षेत्रीय कार्यालयले यस क्षेत्रका देशलाई तत्काल लक्षित समूहमा दादुरा खोप लगाउन आग्रह गरेको छ ।
सन् २०२२ को सुरुआतदेखि दादुराको संक्रमण बढ्दै गएपछि डब्लूएचओले यस्तो आग्रह गरेको हो । डब्ल्यूएचओ युरोपका अनुसार दादुरा खोपको दुई डोजसहितको न्यूनतम ९५ प्रतिशत नियमित कभरेज भाइरसको फैलावट रोक्न र ठूला प्रकोपहरू पुनः बल्झिनबाट रोक्न यो उपाय पर्याप्त हुनेछ ।
यद्यपि, डब्लूएचओले कोभिड–१९ महामारीको प्रतिरक्षा र खोप छुटेका कारण बालबालिकासहित अन्य थुप्रै व्यक्तिमा दादुराको संक्रमण बढेको पाइएकाले यथाशीघ्र खोप अभियानलाई तीव्र पार्न अनुरोध गरेको छ ।
डब्ल्यूएचओले युरोपेली देशहरूलाई पनि ढिलाइ नगरी स्वास्थ्य अनुसन्धान गर्न र दादुराको निगरानी बढाउन आग्रह गरेको छ।
सन् २०१८ र २०१९ ठूला दादुराको प्रकोपपछि, लगभग दुई लाख जनसंख्यामा संक्रमणका घटना उल्लेख गरिएको छ । रासस/ सिन्ह्वा
