काठमाडौँ, १७ माघ । बैंकिङ कसुर मुद्दा लागेर फरार रहेका तीनजनालाई प्रहरीले पक्राउ गरेको छ ।
पक्राउ पर्नेहरूमा काठमाडौँ महानगरपालिका–३२, कोटेश्वर बस्ने ४३ वर्षीय रोसन खत्री, भक्तपुर नगरपालिका–३, तेखाचो बस्ने ३९ वर्षीय गौतम चौगुठी र काठमाडौँको तार्केश्वर नगरपालिका–११, मनमैजु बस्ने नुवाकोट ककनी गाउँपालिका–६ का ४२ वर्षीय राजकुमार लामा रहेका छन् ।
नेपाल प्रहरी प्रधान कार्यालय केन्द्रीय अनुसन्धान ब्यूरोबाट खटिएको प्रहरीले मंगलबार पक्राउ गरेको हो । उनीहरूमध्ये रोसनलाई ललितपुर टिकाथलीबाट, गौतमलाई भक्तपुर वंशगोपालबाट र राजकुमारलाई काठमाडौँ स्वयम्भुबाट पक्राउ गरिएको हो । पक्राउ परेकामध्ये रोसनलाई उच्च अदालत पाटनको २०७९ मंसिर ११ गतेको फैसलाले चारदिन कैद र सात लाख रूपैयाँ जरिवाना सजाय, गौतमलाई २०७९ मंसिर २३ गतेको फैसलाले आठदिन कैद र २२ लाख रूपैयाँ जरिवाना सजाय र राजकुमारलाई २०७९ कात्तिक २५ गतेको फैसलाले १० दिन कैद र १८ लाख ५० हजार रूपैयाँ जरिवाना सजाय तोकेको थियो ।
