काठमाडौँ, १६ माघ । राष्ट्रपति निर्वाचनको मिति फागुण २९ अघि तोक्न निर्वाचन आयोगलाई दवाव पर्दै गएको छ । राष्ट्रपति विद्यादेवी भण्डारीको ५ वर्षको पदावधि यही फागुण २९ गते सकिदैछ । संविधानको धारा ६३ अनुसार राष्ट्रपतिको पदावधि सकिनु एक महिनाअघि निर्वाचन गराउनुपर्ने हुन्छ ।
राष्ट्रपति निर्वाचनसम्बन्धी ऐन २०७४ मा भने कार्यकाल सकिनुभन्दा एक महिनाअघि राष्ट्रपतिको चुनाव हुने गरी मिति तोक्ने भनिएको छ । उक्त कानुनमा निर्वाचन परिणाम आएपछि राष्ट्रपति निर्वाचित भएको मानिने पनि उल्लेख छ । ऐनअनुसार राष्ट्रपति निर्वाचित भइसकेपछि पनि पुरानो राष्ट्रपतिको कार्यभार कायमै रहने भएकाले समस्या देखिएको हो ।
राष्ट्रपति निर्वाचनका सम्बन्धमा संवैधानिक र कानूनी विवाद बढ्दै गएपछि राष्ट्रपति निर्वाचनको मिति तोक्ने विषयमा अन्योलता छाएपछि सार्वजनिक रूपमा टिकाटिप्पणी भइरहेको छ । यस स्थितिमा राष्ट्रपतिको निर्वाचनको मिति तोक्ने विषयमा राजनीतिक दल र तिनका नेताहरूले सार्वजनिक रूपमा अभिव्यक्ति दिने क्रम बढ्दै गएको छ । यसैबीच नेपाली कांग्रेसले फागुन २८ अघि नै राष्ट्रपति निर्वाचन गर्न निर्वाचन आयोगसँग माग गरेको छ । यो समाचार आजको नेपाल समाचारपत्र दैनिकमा छ ।
