तनहुँ, १४ भदौ । तनहुँको व्यास नगरपालिका र म्याग्दे गाउँपालिकाका ९ जना व्यक्तिमा डेङ्गुको सङ्क्रमण देखिएको छ ।
इपिडिमियोलोजी तथा रोग नियन्त्रण महाशाखाका अनुसार गत साउन २४ गते एक जनामा डेङ्गु देखा परेको तनहुँमा यही भदौ ११ गतेसम्म डेङ्गुका बिरामी ९ जना पुगेका छन् ।
गत साउनसम्म दमौली अस्पतालमा डेङ्गुको शङ्का लागेका १२ जनाको परीक्षण गरिएको दमौली अस्पतालले जानकारी गराएको छ ।
हालसम्म गण्डकी प्रदेशका सात जिल्लामा ३३९ जना डेङ्गुका बिरामी फेला परेका छन् । सबैभन्दा बढी कास्कीमा ३१२ र सबैभन्दा कम पर्वत, बागलुङ, लमजुङमा २/२ जना डेङ्गुका बिरामी फेला परेका छन् । स्याङ्जामा ९ जना, तनहुँमा ९ जना, गोरखामा ३ जना डेङ्गुका बिरामी छन् ।
