काठमाडौँ, ३ असार । धरानबाट सुरु भएको डेंगुको संक्रमण बिराटनगर, झापा र उदयपुरमा फाट्टफुट्ट देखा परेको डेंगु सुनसरीमा भने फैलिंदो क्रममा छ ।
सुनसरीका अन्य शहरमा समेत डेंगु भेटिन थालेको छ भने सदरमुकाम इनरुवामा समेत ४ जनामा संक्रमण फेला परेको जनाइएको छ । इनरुवामा धरान पुगेर फर्किएका इनरुवा ९ बबियाका ३५ वर्षिय सराज अन्सारीमा डेंगुको संक्रमण भएको पाइएको हो ।
जिल्ला स्वास्थ्य प्रमुख सागर प्रसाईका अनुसार ज्वरो आएर उपचारकालागि इनरुवा अस्पताल पुर्याइएका सराजको रगत परीक्षण गर्दा डेंगु संक्रमण पाइएको जनाएको छ ।
इनरुवा नगरपालिका भित्र ४ जना डेंगु रोगी फेला परेको बताइएको छ । जसमध्ये इनरुवा वडा नम्वर १ र १० मा समेत डेंगु संक्रमणको आशंका गरिएको छ । ज्वरो आएका केही बिरामीलाई धरान र बिराटनगर पुर्याइएकाले समेत डेंगुको संक्रमण हुन सक्ने अनुमान गरिएको छ ।
धरानमा डेंगु फैलिएपछि इनरुवा नगरभित्र समेत डेंगु मार्ने विषादी छर्ने काम गरिएको थियो ।
