काठमाडौँ, २३ चैत । महोत्तरी जिल्लामा एचआइभी सङ्क्रमितको सङ्ख्या २१८ पुगेको छ ।
जिल्ला स्वास्थ्य कार्यालय महोत्तरीका अनुसार एचआइभी सङ्क्रमितमध्ये ८५ पुरुष, ११६ महिला, तीन तेस्रो लिङ्गी, आठ बालक र ६ बालिका रहेका छन् ।
उक्त सङ्ख्या जिल्ला अस्पतालमा औषधोपचार गराउन आउनेहरुको मात्र हो । अस्पतालको सम्पर्कमा नआउनेहरुलाई गणना गर्दा यो सङ्ख्यामा बृद्धि हुन सक्ने स्वास्थ्य कार्यालय महोत्तरीले जनाएको छ । औषधि वितरण तथा परामर्श शाखामा अहिले २१८ जना नियमित रुपमा सम्पर्कमा रहेको तथा औषधि सेवन गरिरहेको छन ।
जनचेतनाको अभाव, भेद्भाव र लाञ्छनाका कारण एचआइभी सङ्क्रमितहरु चिकित्सक तथा स्वास्थ्य संस्थाको सम्पर्कमा आउन नसकेकाले यो सङ्ख्या अझै बढ्न सक्ने जिल्ला स्वास्थ्य कार्यालयले जनाएको छ ।
