काठमाडौँ, १३ मंसिर । नेपाली महिला भलिबल टाेली १३ औंँ दक्षिण एसियाली खेलकुद प्रतियोगिताको सेमिफाइनलमा प्रवेश गरेको छ ।
आज त्रिपुरेश्वरमा रहेकाे राष्ट्रिय खेलकुद परिषदकाे कभर्ड हलमा भएको समूह चरणको खेलमा भारतले बंगलादेशलाई तीन-शून्यको सोझो सेटमा पराजित गरेपछि नेपाली महिला टिम सेमिफाइनलमा प्रवेश गरेको हो ।
अब नेपालले सेमिफाइनलमा समूह बी को विजेतासँग खेल्नेछ । जसमा नेपालले श्रीलंका र माल्दिभ्समध्ये एक टिमलाई प्रतिद्वन्दी पाउनेछ ।
प्रतियोगितामा दुवै खेलमा हार बेहोरेको बंगलादेश भने बाहिरिएको छ । समूहको पहिलो खेलमा नेपालले बंगलादेशलाई तीन-शुन्यको सोझो सेटमा हराएको थियो भने भारतसँग तीन-शून्यले नै पराजित भएको थियो ।
