एजेन्सी, १२ जेठ । फेसबुकले हालसम्मकै बढी दुई अर्ब ‘फेक एकाउन्ट’ आफ्नो साइटबाट हटाएको छ । जनवरीदेखि मार्चसम्मको ३ महिनामा उसले करिव २ अर्ब २० करोड फेक अकाउन्ट हटाएको जनाएको हो ।
हाल विश्वभरि फेसबुकका कुल प्रयोगकर्ताको संख्या २ अर्ब ३८ करोड रहेको छ । ३ महिनाको अवधिमा २ अर्ब २० करोड फर्जी खाता हटाउनुलाई फेसबुकले हालसम्मकै ठूलो कदमका रुपमा अर्थ्याएको छ ।
फेसबुकका सिइओ मार्क जुकरबर्गले फेसबुक प्रयोगकर्ताहरुको सुविधा तथा सुरक्षाका लागि कम्पनीले आर्टिफिशियल इन्टेलीजेन्सी लागू गर्न गइरहेको छ र अन्य आवश्यक सुधारहरु गरिरहेको बताएका छन् । कम्पनीले एउटा स्वायत्त बोर्ड पनि बनाउन गइरहेको छ र यसले फेसबुकका लागि अदालतले जस्तै काम गर्ने जनाइएको छ । फेसबुक सम्बन्धी गुनासा तथा समस्याको समाधान उक्त बोर्डले गर्नेछ, जसको निर्णय नै अन्तिम मानिनेछ ।
