एजेन्सी, ३० चैत । सुडानमा सैन्य ‘कु’ गरेका सुडान मिलिटरी काउन्सिलका प्रमुख तथा रक्षामन्त्री त्यसबाट पछि हटेका छन् ।
सुडानका रक्षामन्त्रीसमेत रहेका अउफले सैन्य काउन्सिलको नेतृत्व गर्दै ३ दशकदेखि सुडानको राष्ट्रपतिमा सत्तासीन ओमर अली बसिरलाई पक्राउ गरी बिहीबार मात्रै सत्ता हत्याएका थिए ।
अउफले आफ्नो सत्ता टिकाउन सुरुमै सैन्य लेफ्टिनेन्ट जनरल अब्देल फताह अब्देलहमान बुर्हानलाई उत्तराधिकारी बनाउने घोषणासमेत गर्न भ्याएका थिए । तर, त्यसको १ दिनमै अउफ आफ्नो कदमबाट पछि हट्न बाध्य भएका छन् ।
राष्ट्रपति बसिरविरुद्ध लक्षित पछिल्ला केही महिनादेखिका विरोध प्रदर्शनबाट हौसिएका अउफले सैन्य ‘कु’ को पक्षमा जनमत आउने प्रक्षेपण गरेका थिए । तर, उनको अनुमान गलत सावित गर्दै प्रदर्शनकारीहरु सैन्य ‘कु’ विरुद्ध सडकमा ओर्लेका थिए ।
