एजेन्सी, १८ फागुन । जोर्डनका राजा अब्दुल्लाह द्वितीयले पछिल्लो समय भारत र पाकिस्तानबीच बढ्दै गएको तनावलाई लिएर चिन्ता व्यक्त गर्नुभएको छ ।
शुक्रबार जोर्डनका राजा अब्दुल्लाह द्वितीयले पाकिस्तानी प्रधानमन्त्री इमरान खानलाई टेलिफोन गर्दै दक्षिण एसियाका दुई छिमेकी देशबीच बढ्दै गएको तनावका बारेमा कुरा गरेका हुन् ।
पाकिस्तानी सत्तारुढ दल पाकिस्तान तेहरीक–ए–इन्साफका अनुसार दुई देशबीचको तनाव कम गर्न जोर्डनका राजाले मध्यस्थकर्ताको भूमिका निर्वाह गर्ने बताउनुभएको जनाइएको छ ।
पाकिस्तानी प्रधानमन्त्री इमरान खानले दुई देशबीच तनाव कम गर्न पाकिस्तानले आफ्नो पक्षबाट काम गरिरहेको पनि जोर्डनका राजालाई बताइएको जनाइएको छ ।
रुसका राष्ट्रपति भ्लादिमिर पुटिनले फोन गरेर भारतीय प्रधानमन्त्री नरेन्द्र मोदीसँग इस्लामाबाद र नयाँ दिल्लीबीच बढ्दै गएको दूरी छिट्टै हल हुने आशा व्यक्त गरेका थिए ।
केही दिनअघि भारत प्रशासित जम्मू–कश्मीरको पुलवामामा ४० भन्दा बढी सुरक्षाकर्मीको ज्यान जाने गरी भएको आतंकवादी आक्रमणपछि दुई देशबीच तनाव बढ्दै गएको छ ।
शुक्रबार पाकिस्तानले आफू वार्ताबाटै समस्याको समाधान चाहेको भन्दै शान्तिको संकेतस्वरुप पाइलटलाई भारतलाई सुम्पिएको छ । यसले गर्दा पनि भारत–पाकिस्तानबीचको तनाव कम हुने आंकलन गर्न सकिन्छ ।
