काठमाडौँ, १ कार्तिक । बलिउड अभिनेता अजय देवगनको फिल्म ‘दृश्यम–३’ अझै पनि सिनेमाघरमा जोडतोडका साथ चलिरहेकै छ । उता मुम्बईको जुहूस्थित अजय देवगनको बंगलामा भने डोजर चलाइएको छ ।
उनको बंगलामा बृहन्मुम्बई महानगरपालिका (बीएमसी)ले कारबाही गर्दै भित्री भागमा गरिएको अनधिकृत निर्माणलाई बुलडोजरले भत्काएको छ । यो कारबाही बंगलामा बिना अनुमति गरिएका परिवर्तन र निर्माण कार्यका कारण गरिएको हो ।
बंगलाभित्र आवश्यक स्वीकृतिबिना सिपोरेक्स ब्लक प्रयोग गरेर पर्खाल, झ्याल र अन्य संरचनात्मक भागहरूमा परिवर्तन गरिँदै थियो । यस सम्बन्धमा बीएमसीको बिल्डिङ प्रपोजल विभागले मुम्बई महानगरपालिका अन्तर्गत १० सेप्टेम्बर २०२६ मा काम रोक्न नोटिस दिएको थियो । देवगन परिवारले जवाफ दिन चार हप्ताको समय मागेका थिए, तर तोकिएको समय सकिएपछि पनि कुनै कागजात वा जवाफ पेश गरिएन र काम चुपचाप जारी रह्यो । अन्ततः, बिना अनुमति भइरहेको यस निर्माणमा बीएमसीको टोली पुगेर कारबाही गर्यो ।
यो पूरा विवाद बंगलाको व्यावसायिक प्रयोगलाई लिएर सुरु भएको थियो । १० अगस्ट २०२६ मा देवगन परिवारले यो बंगला ‘फ्लोरियन हुरेल सैलून प्राइभेट लिमिटेड’ लाई ५ वर्षका लागि लिजमा दिएका थिए । यो सम्झौता भारु १० करोड ६१ लाख रुपैयाँमा भएको थियो, जसको सुरुको मासिक भाडा भारु १६ लाख रुपैयाँ तय गरिएको थियो । बंगलामा व्यावसायिक सैलून र स्पा खोल्ने योजना थियो, जसको कपोल सोसाइटीका बासिन्दाहरूले लगातार विरोध गर्दै आएका थिए । स्थानियको भनाइ थियो कि आवासीय क्षेत्रमा सैलून खुल्दा ट्राफिक, पार्किङ र सुरक्षाका गम्भीर समस्याहरू खडा हुनेछन् ।
