एजेन्सी, १७ असोज । अष्ट्रेलियामा रोजगारीका लागि उपलब्ध रिक्त पदको सङ्ख्या लगातार दोस्रो तीन महिनाको अवधिमा घटेको छ ।
यसले देशको श्रम बजारमा केही क्षेत्रमा कामदारको माग कमजोर हुँदै गएको संकेत गरेको छ । अष्ट्रेलियाली तथ्याङ्क ब्युरोले सार्वजनिक गरेको पछिल्लो तथ्याङ्कअनुसार अगस्टसम्मको तीन महिनामा रोजगारीका रिक्त पद ०.९ प्रतिशतले घटेका छन्। यस अवधिमा कुल रिक्त पद ३ हजारले घटेर ३ लाख २५ हजार पुगेका छन् ।
यसअघि मेसम्मको तीन महिनामा पनि रोजगारीका रिक्त पद २।२ प्रतिशतले घटेका थिए । यसरी लगातार दुई अवधिमा रिक्त पद घट्नुले अष्ट्रेलियाको रोजगारी बजारमा मागको अवस्था केही कमजोर बनेको देखाएको छ ।
रोजगारीका रिक्त पदमा आएको पछिल्लो गिरावट मुख्य रूपमा निजी क्षेत्रबाट भएको हो । अगस्टसम्मको तीन महिनामा निजी क्षेत्रका रिक्त पद २ प्रतिशत अर्थात् ५ हजार ८ सयले घटेका छन् ।
यसको विपरीत, सार्वजनिक क्षेत्रमा भने रिक्त पद बढेका छन् । सोही अवधिमा सार्वजनिक क्षेत्रका रिक्त पद ७।८ प्रतिशत अर्थात् २ हजार ८ सयले वृद्धि भएका छन् । यसले निजी र सार्वजनिक क्षेत्रको रोजगारी मागबिच फरक अवस्था देखाएको छ । निजी क्षेत्रमा नयाँ कर्मचारी आवश्यक पर्ने पदको सङ्ख्या घट्दा सार्वजनिक क्षेत्रमा भने थप कर्मचारी आवश्यक पर्ने पद बढेका छन् ।
