काठमाडौँ, ३ भदौ । नेपाली कांग्रेसले १५ औँ महाधिवेशनको तालिका सार्वजनिक गरेको छ ।
केन्द्रीय निर्वाचन समितिका संयोजक प्रेमबहादुर खड्काले विज्ञप्ति जारी गर्दै निर्वाचन तालिका सार्वजनिक गरेका हुन् । निर्वाचन समितिका अनुसार भदौ २ गते देखि १० गतेसम्म निर्वाचन प्रतिनिधि अभिमुखीकरण कार्यक्रम सञ्चालन हुनेछ ।
भदौ ११ गते जिल्लामा निर्वाचन अधिकृत खटाउने, भदौ १५ मा वडामा निर्वाचन प्रतिनिधि खटाउने,भदौ १६ देखि २० गतेसम्म वडामा अभिमुखीकरण र भदौ मसान्तसम्म जनसम्पर्क समितिको अधिवेशन सम्पन्न गर्ने तालिका छ ।
भदौ २४ गते सबै वडामा अधिवेशन तोकिएको छ । भदौ २७ मा गाउँ/नगर अधिवेशन, भदौ ३१ मा प्रदेशसभा क्षेत्रीय अधिवेशन, असोज २ गते एकमात्र क्षेत्र भएको जिल्ला अधिवेशन गर्ने तालिकामा उल्लेख छ ।
असोज ७ गते जिल्ला अधिवेशन, असोज १० गते प्रदेश र असोज १६ देखि १९ सम्म केन्द्रीय महाधिवेशन सम्पन्न गर्ने कार्यतालिकामा भनिएको छ ।
निर्वाचन समितिका अनुसार हालसम्म अमेरिका, जापान, फ्रान्स, दक्षिण कोरियालगायत १५ देशका जनसम्पर्क समितिका अधिवेशन सम्पन्न भएका छन् ।
